پاک فوج کے ترجمان لیفٹیننٹ جنرل احمد شریف چوہدری نے کہا ہے کہ دہشت گردی کے تمام واقعات کے پیچھے بھارتی منفی سوچ اور وسائل کار فرما ہیں جبکہ افواج پاکستان اس پراکسی جنگ کا قلع قمع کرنے کی پوری صلاحیت رکھتی ہیں۔
پاک فوج کے شعبہ تعلقات عامہ (آئی ایس پی آر) کے ڈائریکٹر جنرل(ڈی جی) لیفٹیننٹ جنرل احمد شریف چوہدری سے کونسل آف پاکستان نیوز پیپر ایڈیٹرز (سی پی این ای) کے وفد نے کاظم خان کی سربراہی میں ملاقات کی۔
ڈی جی آئی ایس پی آر نے سی پی این ای کے وفد سے گفتگو کرتے ہوئے کہا کہ نوجوان اس ملک کا سرمایہ ہیں اور ان کی ملک کے بارے میں مثبت سوچ پاکستان کے روشن مستقبل کی دلیل ہے۔
لیفٹننٹ جنرل احمد شریف چوہدری نے کہا کہ دہشت گردی کے تمام واقعات کے پیچھے بھارتی منفی سوچ اور وسائل کار فرما ہیں جبکہ پاکستان کی افواج عوام کی تائید سے اس پراکسی جنگ کا قلع قمع کرنے کی پوری صلاحیت رکھتی ہے۔
انہوں نے کہا کہ بلوچستان میں منفی پروپیگنڈے کے ذریعے عوام میں مایوسی پھیلانے کی مذموم کوششیں کبھی کامیاب نہیں ہوں گی کیونکہ بلوچستان کے محب وطن اور غیور عوام ان ملک دشمن عناصر اور ان کے بیرونی آقاؤں کی ریشہ دوانیوں سے بخوبی آگاہ ہیں۔
ڈی جی آئی ایس پی آر نے کہا کہ میڈیا نے پاکستان کو درپیش مسائل اور چیلیجز میں ہمیشہ ایک ذمہ دارانہ اور مثبت کردار ادا کیا ہے، معرکہ حق کے دوران پاکستانی میڈیا نے نہ صرف ذمہ دارانہ اور اعلیٰ صحافتی اقدار کا مظاہرہ کیا بلکہ انڈین میڈیا کے منفی پروپیگنڈے کا انتہائی مؤثر جواب دیا۔
اس موقع پر سی پی این ای کے وفد کے اراکین نے کہا کہ معرکہ حق کے دوران شان دار کارکردگی پر افواج پاکستان کو خراج تحسین پیش کرتے ہیں، معرکہ حق کے تمام مراحل کے دوران آئی ایس پی آرنے کلیدی کردار ادا کیا اور ہندوستانی میڈیا کے ہیجان انگیز پروپیگنڈے کے جواب میں بروقت اور معتبر اطلاعات کی فراہمی یقینی بنائی۔
سی پی این ای کے وفد نے کہا کہ یہ فقید المثال فتح پاکستانی قوم، حکومت پاکستان اور عسکری اداروں کی باہمی اور مربوط حکمت عملی کا ثمر ہے۔
